Արաքս գետի վրա երկրորդ կամրջի նախագծային աշխատանքներն ավարտված են. Իրանի դեսպան

09:53 7 Փետրվար 2025

Իսլամական հեղափոխության հաղթանակի 46-րդ տարեդարձի կապակցությամբ հրավիրված մամուլի ասուլիսի ժամանակ այս մասին ասաց Հայաստանում Իրանի դեսպան Մեհդի Սոբհանին։

«Արաքս գետի վրա երկրորդ կամրջի կառուցումն անհրաժեշտություն է։ Այս մասին է վկայում կամրջով անցումների վիճակագրությունը։ Վերջին 10 ամիսների տվյալներով՝ երկու երկրների միջև այցելությունների ընդհանուր թիվը կազմել է 231 293: Նրանցից 66 593-ը Իրանի քաղաքացիներ են, 164 700-ը՝ Հայաստանի»,- նշեց Սոբհանին։

Նրա խոսքով՝ ընդհանուր 456 502 մարդ է հատել սահմանն ու վերադարձել։ Նույն ժամանակահատվածում սահմանը հատել է 126 890 բեռնատար։

«Երկրների միջև առևտրաշրջանառությունը կազմում է 785 մլն դոլար։ Առաջիկայում մենք ցանկանում ենք այդ թիվը հասցնել 1 մլրդ դոլարի, իսկ հաջորդ փուլում՝ տարեկան 3 մլրդ դոլարի»,- ասաց Սոբհանին։

Դեսպանի խոսքով՝ Իրանի և Հայաստանի միջև առևտրի զարգացմանը նպաստում է նաև ԵԱՏՄ-ում դիտորդի կարգավիճակը, և այս ամենը խոսում է երկրորդ կամրջի կառուցման օգտին։

«Դրան կողմ ենք և՛ մենք, և՛ Հայաստանի կառավարությունը։ Այժմ այդ ուղղությամբ քննարկումներ են ընթանում, նախագծային աշխատանքներն իրականացվել են։ Հուսով եմ, որ մենք վերջնական պայմանավորվածության կհասնենք, և շինարարական աշխատանքները կմեկնարկեն»,- նշեց իրանցի դիվանագետը։

Ավելի վաղ ՀՀ տարածքային կառավարման և ենթակառուցվածքների նախարարության մամուլի ծառայությունից Sputnik Արմենիային հայտնել էին, որ Երևանն ու Թեհրանը շարունակում են քննարկել Արաքս գետի վրա երկրորդ կամրջի կառուցման տեխնիկական հարցերը։

Հիշեցնենք, որ Արաքս գետի վրա նոր կամրջի կառուցման նախագծի աշխատանքները սկսվել են 2023 թվականի վերջին։ Երևանում չեն բացառել, որ նոր կամուրջը կառուցվի գործողին զուգահեռ։

Գոյություն ունեցող կամուրջը կառուցվել է 1995 թվականին։

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

Արաքս գետի վրա երկրորդ կամրջի նախագծային աշխատանքներն ավարտված են. Իրանի դեսպան

Լրահոս

Փոխկապակցված նորություններ

Քաղաքականություն

Աշխարհ